موضوعات أخرى

اختفى البَطَل

موقف القلب
اختفى البَطَل
بقلم : ميكال حدَّاد

أحياناً مَشاعِرنا كنساء بتعتمد على الرَّجل إلّي بحياتنا. لهالسَّبب كثير من النِّساء بيعتقدوا إنّه فَرَحْهُم رَح يِكْمَل لمّا يلاقوا شريك حَياتهُم. لهالسبب أيضاً كثير صبايا بضيعو سنين عايشين بكآبة، أو بينتقلوا من عَلاقَة لَعَلاقة ثانية، وثالثة، لأنه هَدَفهُم يلاقوا السَّعادة.

لاحظي كيف إحنا البشر بنتعلَّق بالأشخاص. بعد ما خَرَج شَعب الله من أرض مصر، موسى قضى وقت طويل على "جَبَل سينا" كان فيه بكلّم الله. لمَّا طال الوقت، النَّاس قلقت وبلَّش الكُلّ يِتذَمَّرعلى هارون، أخو موسى، و قالوا: "قُمْ اصنع لنا آلهة تسير أمامنا. لأنَّ هذا موسى الرَّجل الذي أصعدنا من أرض مصر لا نعلم ماذا أصابَهُ" (خروج ٣٢: ١). و كأنّه موسى هوّهِ البَطَل إلِّلى حرَّرهم من العبوديّة، مش الله. لمَّا اختفى موسى من الصُّورة، دبّ الخوف بقلوبهم، وصاروا يبحثوا عن إله، وبَطَّل فيه بديل.

أحياناً لمّا تِفشَل علاقة مُعيّنة أو يختفي شخص مُعيَّن من حَياتِك، بسرعة بتبلشي تبحثي عن بديل حتى يِملا الفراغ، مش بس إنتِ، كُلنا منمُرّ بنفس الظّرف، وأنَّا أوَّل وَحدة. لكن الغَلَط أنّه نحُطّ كُل أحلامنا وآمالنا بشخص محدَّد. شعب الله نسيوا مُعجِزات الله الكثيرة معهم؛ نسيوا كيف اجتازوا البحر الأحمَر على رجليهم، ونسيوا كيف خلقلهم الله ينبوع مَيّ بنص البرِّيَّة، نسيوا كيف السَّما أمطرَت أَكِل لَمَّا جاعوا، وأنا وإنتِ بنِنسَى كمان.

بَشَجعِك اليوم تِتذَكَّري مواعيد الله ولُطفه عليكِ بالسنين الماضية. ولمَّا شخص يقرر يختفي من حياتك ما تسمَحي للحُزُن والقَلَق يِستَولوا على مشاعرِك. إنتِ بِنت الملك، بِنت الله. خلِّي عيونِك مسمَّرَة على أبوكِ السَّماوي، وخَلِّي فرَحِك ثابِت فيه لو مهما صار. هاد قراري أنا، وبصلِّي يكون قرارِك إنتِ كمان.

إضافة تعليق
بريد ألكتروني