موضوعات أخرى

جرِّب ارمِ شوِّيت حُبّ

حكايات من الشارع
جرِّب ارمِ شوِّيت حُبّ
بقلم : شكري البوري

إجت شكوى من معلمة إخواني أنه واحد منهم ما بِفصل بين المزح والجَدّ.. بظل يضحك كلّ الوقت خصوصًا بحصّة الرِّياضيات.. بتعطيه المعلمة أبسط المسائل ما بحلّها، بقعد يتخوَّت ويرمي أرقام وإجابات عشوائية ويضحك.. بتسأله مثلًا قدِّيش الـ٣ بدها لتصير ٤؟ بحكيلها ٢ وبصير يضحك.. بترجع تسأله كمان مرَّة، بعطيها جواب ثاني عشوائي وبضحك. أنا فهمت عليه ع طول أنه عنده ضعف بالرياضيات، وهو جد ما بعرف يجاوب... هاي الأرقام مش عشوائية بس هي نتيجة حسابه وهذا اللي طلع معه، بس عشان يخبِّي إنه طلع جوابه غلط بصير يضحك فبضيّع الجِدِّيَّة اللي بالحصَّة، الجدِّيَّة اللي حاطّة كلّ العيون عليه. قعدْت وحكيت معه على جنب، وفهَّمْته أنه عادي الواحد يكون ما بعرف ويحكي ما بعرف ومش فاهم، وعادي المعلمة ترجع تعيد المعلومة أكثر من مرَّة ومن هالحكي... المهم فهم عليّ واتفقنا.

 ثاني يوم رجع أخوه بحكي عنه أنه كثير شاطر بالرِّياضيات، وجاوب كلّ الأسئلة، وما كان يضحك، وما غلَّب المعلمة.

إذا بموقف جدّي شُفت واحد بضحك، فيمكن تفكِّر للوهلة الأولى أنه زلمة مش جدّي ما بميّز بين الجدّ والمزح، وبعرفش يتعامل مع المواقف الحرِجة، وما بحترم القعدة ولا اللي موجودين.. بس مرّات ورا هاي الضّحكة مخبَّى تعب وألم وجرح قديم، فحاول يخبِّي ذكريات وحقائق بضحكة أو بمزحه. عم بتعلّم أفهم الدوافع قبل ما أحكم على الناس... دوافع الأفعال بتغيِّر نظرتك للأشخاص، لأنّه:

ورا العصبيَّة الفجائيَّة معنى...
ورا الجدِّيَّة الحازِمة معنى...
ورا العطف والحِنِّيَّة الزايدة معنى...
ورا الدَّمعة السَّريعة معنى...
ورا الصّوت العالي، أو الصّوت اللي مش طالع معنى...

اللِّي بفرق مع هدول الأشخاص مش الشَّطارة أنك فهمتها... أو أنك الحِدِق اللي لقطت شو دوافعه... اللي رح يفرق أنَّك تروح وتحكي معه وتحكيله في حدّ فاهمك وقريب منَّك... شخص ما بدّه يحكم عليك بس حابِب يساعدك... شخص بحبَّك وخايِف على مصلحتك.

جرِّب ارمِ بطريق هذا الشَّخص شويِّة "حُبّ"، وشوف كيف رح يطلع الأفضل منّه.

إضافة تعليق
بريد ألكتروني