موضوعات أخرى

بتبلِّش بِكُرة

حكايات من الشارع
بتبلِّش بِكُرة
بقلم : شكري البوري

أخوي الصغير اليوم بموقفين حد طلب منه إشي وما رضي يعطيه. أول مرّة "كُرة" قدم ما بلعب فيها، وثاني مرّة "بلّون" هيليوم برضه ما بستخدمه. طبعًا بالأخير أعطاهم بعد ما حكيت معه على جنب.. بس في كل مرة بكى بعد ما أعطى.

من أصعب الأشياء اللي تغلبت فيها شخصيًا هي العطاء.. بتبلش "بِكُرة" أو "بلّون" ما برضى أعطيه بصِغري، وما حد بِفَهِّمني أنه لازم أعطي ف بتعود هيك. بتكبر معي القصة بدون ما أنتبه... بَصير أبخل على الناس بوقتي، بحُبي، بعلاقاتي، بأغراضي حتى اللي مش محتاجها، بتوصيلة، بمعلومة، بمصاري زياده عندي. أغلب الوقت بكون خوفًا أني أخسر لما أعطي.

اللي ما حكيته لأخوي أنه بكرا رح أروح أشتريله بلالين وكُرة بدل اللي أعطاهم.

يمكن اللي بخوِّفنا بالعطاء أنه لو أعطينا نحن خسرنا... وما حد شايف... وما حد مقدِّر... وأنا مش مستفيد، وما رح يجيني إشي من الموضوع غير الخسارة الّلي قدمتها عشان شخص بجوز أصلًا ما بعرفه.

بس الموضوع مختلف كثير... تعلَّمت من ربنا عن طريق إخواني أنه مختلف كثير!!

العطاء مكسب للطّرفين... العطاء يعني حُبّ، والحُبّ بغيِّر إلى الأفضل في الطَّرفين. أعطِ وإنت مبسوط.

إضافة تعليق
بريد ألكتروني